Explorar los documents (4 total)

L'emission es un reportatge realizat a l'escasença d'un collòqui organizat pel RedÒc en 2010 a l'universitat de Montpelhièr 3, nommat : "Los trobadors dins los tèxtes occitans del sègle 20".
Es constituïda d'entrevistas e de captacions dels intervenents : Gerard Gouiran, professor emerit especialist de las lengas romanicas a l'universitat Pau Valéry de Montpelhièr ; Pèire Bèc, filològ e medievalista ; Felip Martel, professor d'Istòria al departament occitan de l'universitat Pau Valéry de Montpelhièr ; Silvan Chabaud, cantaire del grop Mauresca Fracàs Dub ; Katy Bernard, medievalista occitanofòn ; e Marie-Jeanne Verny, professora de letras al departament occitan de l'universitat Pau Valéry de Montpelhièr.

Per de questions de dreches, los extrachs musicals difusats dins l'emission podon pas èsser mes en linha, foguèron doncas talhats de l'enregistrament.

Emission dau 29 de novembre de 2018. 

Fai 20 ans que lo Med'òc, associacion d'estudiants occitans, veguèt lo jorn, dins l'Universitat Pau Valèri de Montpellier. De son nom complet « Med'òc dau Clapàs », l'associacion es a l'origina d'un molonàs d'eveniments per los estudiants e non estudiants, per promòure la cultura e la lenga nòstras. « Intelligent e bolegadís » son lei mòts mèstres dau Med'òc.
Vos presentam leis accions e lei caras d'aqueste moviment que festejava sos 20 ans en 2018. Un reportatge de Lisa Gròs.

Primièr episòdi d'una emission de Ràdio Lenga d'Òc consacrada a la catorzena edicion del festenal Las Voses de la Mediterranèa de Lodève.
Las Voses de la Mediterranèa es un festenal d'estiu consacrat a las òbras poeticas d'aicí e d'autre biais. L'idèa principala essent de crear de moments de rencontres e d'escambis multiculturals. Lo festenal s'es escantit en 2015 per de rasons financièras. La particularitat de l'edicion de 2011 residís dins l'accent mes suls poètas joves de lenga occitana.

Aquel episòdi de l'emission Camina que caminaràs, menada per Aimat Bress sus las ondas de Ràdio Lenga d'Òc en 2011, se compausa d'entretens e de captacions. S'i ausís sustot l'organizatritz del festenal, Adeline Yzac, dos joves poètas, Aurélie Lassaque e Silvan Chabaud e lo fotograf Georges Souche.

Per de questions de dreches, los extraches musicals difusats dins aquela emission pòdon pas èsser mes en linha, foguèron doncas talhats de l'enregistrament.